الاثنين، 26 سبتمبر، 2011

لك لسان

Free Rating Code
لك لسان و لسائر الكائنات ألسنة..و يبقى الفرق بينكما (كلمة)ينطق بها لسانك..ان لم تحترمها..فأنت و هم في المقام سواء           
MY QUOTES : http://www.goodreads.com/quotes/show/439883

الخميس، 8 سبتمبر، 2011

أنا و الجنون

 
أنا و الجنون نتصارع ..لأنتصر مرة فأحظى بسعادة من حولي..
و ينتصر مرة..فأحظى بسعادتي
http://www.goodreads.com/quotes/show/423970

الأربعاء، 7 سبتمبر، 2011

لحظة ولادة

لما السواد كان له السيادة

و الكبر كان أصل العبادة

يا دنيا عاشقة للخطية

و بحرها بيقول زيادة

بتتولد لحظة و تولد بيها كون

الله يهادي الكون لجل اما يتزين

بالرحمة متجسدة..فالصخر يتلين

لحظة ولادة النبي الصعب كان هين

في ليلة وقت السحر..قبل ما تنور سماها

كان ميلاد الرحمة حل و اسمها أحمد و طه

فانطفت نارك يا كسرى

والشيطان قلبه اتلوى..حس بعد الكبر كسرة

و بعد دوبان الرسالة على يد كفار او يهود جه محمد الامين قام مدوب الحدود

وحد العالم في اسرة.

في الاولة موسى و بعده المسيح بشر

قال جي بعدي رسول

لا صوته يوم ارتفع ولا الجبين كشر

ببسمته الكون يكون بعد العدم

و أمته كل البشر..عرب عبيد أو عجم

في دعوته..داق العذاب ألوان

دبحوا الجمل..و في الصلا..يرموا على ضهره الحشا

لو ردت الروح للجمل..من دة العمل..كان اختشى

رغم الاذى

الحلم..كان رد الامين..فلا بغى ولا ديارهم يوم غزا

ولا لغير الله بكى ..ولا اشتكى..ولا دعى بغير الهدى

في البدء قال الله صمد

بالحسنى قام أحمد صمد

و أنا لو في سيرتك بدي أقول ..متكفينيش فيك السطور

بينا يا أحباب النبي

صلوا على سيدنا الرسول

الخميس، 1 سبتمبر، 2011

ما هو المشروع !!!!

بعض المشروع ممنوع))
دة مش قمع ولا كبت ولا انحباس...
شوف كام مشروع معمول..عشان يمص دم الناس 
!!!!!!!!!!!!!!!!! 

http://www.goodreads.com/quotes/show/430682

الأربعاء، 10 أغسطس، 2011

الشبح


عرفت معنى الحب في الزمن القديم
في قصيدة لنزار و في غنوة لحليم
ياما انوصف بالهوى ..بالبحر ..و بجمال الورود.
و استنى يوم ورا يوم لحد ما يجيني الحبيب
و احلمبي اغنيله أغانى الست و العندليب.
و لما جه ..وجب علية الاعتذار.
وقف الكلام في جوفي صابنى الوجوم
لا عرفت أقوله بحبك ..ولا عديت النجوم.
جيت أوصفه بالهوى ملقيتش غير الغبار.
سبت الهوى ..ونزلت أدور ع الشجر جوة الطريق.
زي اللي نفسه ف قشة تنقذ الحلم الغريق.
لا لقيت شجر ولا خضار..ملقيتش غير العماير بتسد نور النهار.
و البحر..البحر كان أزرق لقيته لون الطين.
و الشط ..قالوا عليه رايق..لقيت عليه ملايين.
كأنه يوم الحشر.
ما هو كل شىء انكتب طلع مجرد حكاوي
لا لقيت سما لونها سماوي..ولا طيور و بلابل تنشد في الغناوي.
وبري اتنحل و أنا بدور لحبي على دليل
لا لقيت ورد ولا شجر و لا حتى سعفة نخيل
كل اللي شفته كان شوارع مرصوفة جوة أكوام الزبالة
و ناس لروحها الشر غيّة و الخير..اشتغالة.
شفت البطون ملهوفة على لقمة حرام..
و ساعتها بس عرفت ليه صوتي اتخرس و ليه نسيت الكلام.
مفيش في زمني يا حبيبي للحب وصف.
لا هقدر أكتب يوم قصيدة حب و لا هقدر أكتب حتى حرف.
في عنيه دموعي رغرغت ع  الحب اللي مات و اندبح.
مفضلش منه غير شبح .. 
اّخرة يعيش في ليلة م الزمن القديم ..في قصيدة لنزار او غنوة لحليم

انا اّسف

video

أنا اّسف يا ظالمني
أنا الظالم أنا المحقوق
أنا اللي ف عصري عشت اقل م البغلة ف عهد الفاروق.
و أنا اللي اديك على وشي بقت بصمة
فعشت سنيني انا مصدق باأن صرختي وصمة
وانا اللي رضيت
رضيت اقلب موازيني.
و خليتك في قلب بلادي تنفيني
و لكني في شوق للعدل
هيصبح حقي هو الكيف
و هرجع تاني أكون انسان ..عشان ملّيت في توب الطيف
فلا هقبل أموت صاحي ومن غير حس
و لا دودك هينهشني لا دمي اتخلق للمص
ولا نعلك يكون سقفي
ولا هرجع أعيش تاني و أنا من وشي متخفي
و روحي للجسد تترد ..عشان مبقتش على كفي.
فييجي اليوم عشان تعرف باْن دموعي صعب تسيل ..عشان جفت
و ان الدنيا بعد الوقف .. عليك لفت
و لجل تتوب و تتطهر ..من الذنب اللي عليك كان فرض
فنتعاتب و نتصالح
و بعد ما عشنا في جهنم ..نعود تاني نعيش ع الارض.

الشمس تشرق من الغرب

video


من بعد الاف السنين ... حدثت يا موسى المعجزة
الشرق غربت منه شمس و الغرب اشرق بالشموس
باتت بلاد الشرق دوما ع الذكريات متعكزة
بعد اما كانت يوم منارة.. محصلتش اليوم فانوس
بددنا بادينا الحضارة.. حتى التاريخ محفظنهوش
استوردوا كل التاريخ و صدرولنا بيه كازوز
اخدوا اللي ربوا بيه عقولهم و سابونا بنربي ف كروش
و لفلفونا في طاحونة.. قرش زايد او غموس
في ارضي..زرعوا حلمهم و ربطونا في السواقي
اكلوا الزبد كله و اكلنا.. اللي فاضل م البواقي
نحصد الحلم الغريب..اما الغريب.. بيجري في عجل التروس
يا شمس امتى ترجعي
م الشرق تاني تشرقي؟
سؤال اجابته صمت متغلف بحيرة
طول ما مهم ان احنا نسأل مين مسلمين و مين نصارى
طول ما ف نافوخنا ان الكتاب قيمتة اقل من السيجارة
و ان اللي بيعيشوا في شارع..
انبغ و انضف م اللي بيعيشوا في حارة
و الرشوة ولا المفهومية و الفهلوة هي الشطارة
طول ما الشباب عيال و بس.. اما الخبير هو العجوز..نفضل في ضل شمسهم
ولا مرة.. رح تتساوى روس
لكن ايماني بان بكرة جي حي
حي و هيحيي المعجزة
غدا ساصحو بعد حين م الضلام على صبح بشوش
سأرى بعيني شمس شرقي اشرقت..و تبث روح في النفوس
و ارى بعيني شرقي يحيي مجده
و اراه ثغرا باسما
من بعد سنوات العبوس ...

الخميس، 7 يوليو، 2011

ديني حصري


video
 
فكرت أكتب لك غنوة لقيتني راح أغني عليكي
قلت هحكيلك حكاية
عن هموم لسٌاها بتمص ف دمايا
عن أيادي لونها ليلي لسه بتهد ف بنايا
أو هقولك
ع اللي صانك .. ع اللي خانك
عن شجاعك عن جبانك
أو علي جلدي اللي منسوج من خيطانك
و اللي باش من كتر ما اتشرب مهانك
بس قررت إني أبدأ الحكاية بالقسم
أقسم بإيماني بمحمد بالمسيح الحي
كلمة الله اللي شقت في الضلام الضي
إنه نصراني و ناصرني
ف عز أيام الجهاد بين جفونه كان حاملني
ياما كلنا صحن جوع ممزوج بهمه قبل همي
و كان هو بيصلب عليه و ف نفس النفس بسمي
و أما أدور جوه أصله
راح ألاقي إن أصله إما أخويه أو إبن عمي
أيوه أنا مسلم و لكن أصلي قبطي
عشت عمري فيكي حاضر و إنتي عني ياما غبتي
كنت أرد اللي يعادي و كان منايا تردي غيبتي
و أما قررتي تحاربي كنت أول من حاربتي
يبقي ليه تطابيني أتوب ؟
ولا ليه أكفر ذنوب ؟
هو يعني إنتي اللي توبتي ؟
بس ليه عليكي ألوم و إنتي ملياكي الشجون !
راح ألومك علي ولدك اللي ناسي دينه
بدي تعرف مين يا قبطي
حررك من إيد بيزنطي
و إنت يا مسلم جدودك
لما أسعفهم نجاشي
قوم و دور جوه أصلك و إحرق الجهل اللي فاشي
و بدل ما تحرقلك كنيسة
إحرق الإيد الخسيسة
اللي حبست صوت ولادك في الحناجر
إللي بيقتل ف أخوه و إللي بالأديان يتاجر
و إللي واخدك جوه حضنه و بإيديه مسلط خناجر
و أما أسأل عن ديانتك
قوم و قوللي ديني حصري
قبل ما تقوللي إني قبطي
قبل ما تقوللي إني مسلم
قوم و قوللي ديني مصري