الأربعاء، 10 أغسطس، 2011

انا اّسف

video

أنا اّسف يا ظالمني
أنا الظالم أنا المحقوق
أنا اللي ف عصري عشت اقل م البغلة ف عهد الفاروق.
و أنا اللي اديك على وشي بقت بصمة
فعشت سنيني انا مصدق باأن صرختي وصمة
وانا اللي رضيت
رضيت اقلب موازيني.
و خليتك في قلب بلادي تنفيني
و لكني في شوق للعدل
هيصبح حقي هو الكيف
و هرجع تاني أكون انسان ..عشان ملّيت في توب الطيف
فلا هقبل أموت صاحي ومن غير حس
و لا دودك هينهشني لا دمي اتخلق للمص
ولا نعلك يكون سقفي
ولا هرجع أعيش تاني و أنا من وشي متخفي
و روحي للجسد تترد ..عشان مبقتش على كفي.
فييجي اليوم عشان تعرف باْن دموعي صعب تسيل ..عشان جفت
و ان الدنيا بعد الوقف .. عليك لفت
و لجل تتوب و تتطهر ..من الذنب اللي عليك كان فرض
فنتعاتب و نتصالح
و بعد ما عشنا في جهنم ..نعود تاني نعيش ع الارض.

هناك تعليقان (2):

  1. إيه الجمال ده يا ساااااااااارة :)

    ردحذف
  2. الله يخليكي يا أميرة ..أنا سعيدة جدا ان القصيدة عجبتك ..و هفضل دايما بستنى رأيك و نصايحك ..دمت صديقتي العزيزة :))))

    ردحذف